– Det var eit særs vellukka samarbeid under Forskingsdagane i fjor haust som ga meirsmak. Sidan då har eit programråd jobba fram eit nyskapande formidlingskonsept, seier viserektor Anne-Lise Sagen Major ved NTNU i Ålesund.
Ho gler seg til det som dei no kan sette i gang.
– Datoen er sett til måndag 5. februar. Programmet startar 19.00 og arrangementet er gratis. Det er alt plan for tre arrangement med Påfyll før sommaren og tre til hausten. Blir det god mottaking håper eg at vi her får til noko varig, seier viserektoren.
– Det er universitetet og andre forskingsaktørar si oppgåve å bidra til formidling av den kunnskapsutviklinga vi driv med.
– Vi har eit felles ynskje om å få fram meir av den spennande forskinga som skjer lokalt og vi vil vise fram Ålesund som kunnskapsby, seier viserektoren.
Forskingsaktørane som deltek er NTNU, SINTEF, Møreforsking, Helse Møre og Romsdal HF, Atlanterhavsparken og Ålesund kommune. Dei har i oppgåve å finne fram til dei rette fagfolka, som kan formidle innan ulike samfunnsaktuelle tema.
Parken kulturhus med kulturhusleiar Hans Pareliussen hadde ideen om ein fast kveld med fokus på forsking, med NTNU som startmotor. Kulturhuset vil stå for den tekniske koordineringa.
Framtidslaben/The North West konkretiserer konseptet og stiller med produsent for innhaldet.
Sparebanken Møre er sponsor.
Å vere programvert ut frå bestillinga til programrådet var ikkje for kven som helst. Forfattar Bjørn Vatne vart derfor kontakta i slutten av november.
Kunne han tenke seg utfordringa?
Svaret var positivt.
Han er i full gang med å lese seg opp på det fyrste temaet. Det vil dreie seg om kunstig intelligens.
– Et talkshow har jo ingenting med litteratur å gjere, tenkte jeg fyrst. Men då arrangørane fortalde kva dei ville ha, kunne eg ikkje si nei. Eg er ein frykteleg nysgjerrig fyr. No får eg sitte ansikt til ansikt med ekspertar på alle slags felt, og stille dei så dumme og nærgåande spørsmål eg berre vil.
– Det er rett og slett eit glimrande høve til å drive research, seier Vatne, som lover å både sleppe til publikum og ta det heile ned på eit folkeleg og humørfylt nivå.
Første Påfyll har fått tittelen «Smarte folk om kunstig intelligens: Derfor må du bry deg!». Dei som skal bidra blir presentert om kort tid.